Kakichhuah khawtlang ah hrileng avangin nunna chan panga an awm ta. Medical team te a hnun ah kal in an harsatna an enfiah
Rauthla 12.11.2025 (Nilaini) : Tunlai hian Kakichhuah khaw chhungah Tuihri a len avangin nunna chan panga an awm tawh. He thu hi hriat anih veleh Lawngtlai District Bawrhsap Pu Donny Lalruatsanga ruahmanna in Medical team te nimin khan tirh an ni a. Damlo te endik in, damdawi te an sem nghal a ni.
Kakichhuah hi Lawngtlai District chhunga awm a ni a. Ram thenawm Myanmar ramri dep a awm a ni a. He hrileng avang hian November 4 khan Lawmla (75) chu a boral a. Hemi hnu November 9 khan Neda (24) leh Kailaw (48) chu a boral ve leh a. Nimin khan Sawla (28) chu a boral leh bawk a. Tin, tukin zing dar 4:00 Am vel khan Chawlithaw (14) chu a boral ve leh a, tun dinhmun ah hian mi panga in he hrileng avang hian nunna an chan tawh a ni. Heng thihna thleng chungchangah hian Bialtu MDC Pu H.Lalmuansanga chuan, khawtlang in harsatna an neih te hria in, Lawngtlai District Bawrhsap chu hma la tur in a ngen nghal a. Lawngtlai District Bawrhsap Pu Donny Lalruatsanga chuan CMO Dr.Lalmuanawma Jongte chu be nghalin ruahmanna hmanhmawh taka siam in, nimin khan Medical team Dr.C.Lalzampuii hovin Kakichhuah panin mi pali an kal nghal ani.
Medical Team te hi Kakichhuah an thlen ve leh clinic hi an nei nghal a. Kan thudawnna in a sawi danin, he hrileng avang hian damlo mi 28 lai an awm a, chung mite chu treatment pek nghal an ni a. Tichuan, nizan 9:30 pm vel khan Medical team te pawh hian Kakichhuah hi chhuahsanin Lawngtlai an rawn pan leh nghal a ni.
He hrileng avang hian khawtlang hruaitute pawh an buai hle a. Hmun danga a kai darh lohna turin theihtawp chhuahin fimkhur an inzirtir nasa hle a. An khawtlang hruaitute chuan an khaw tan tlanga lirthei lokal tur te pawh fimkhur turin an ngen a ni.
Dr Lalmuanawma Jongte CMO chuan, mipui te chiai lo tura chahin, Ei leh in ah fimkhur tur leh Tui chhuanso dah daih leh chauh inturte, zun leh ek thlahdah lo turin a chah a, tun dinhmun ah damlo 15 atanga 20 vel an awm mek niin a hriat a, he natna veite chuan rangtaka Damdawi lam thiamte rawn zung zung turin a chah bawk.
Kan thudawnna in a sawi danin, Kakichhuah khaw thenawm Lungdar ah pawh hri leng avangin nunna chan an awm tih hriat a ni a. Lungdar (Siaha District) hi Hruitezawl chhak a awm a, tuipui kam a awm an ni a. Tun dinhmun ah hian khaw thenawm ah pawh a kangkai tan niin a lang a ni.
Heng khaw paltlang hian ram thenawm Myanmar lamah bungraw phur lirthei eng emaw zat a tlan thin a. Fimkhur a ngai hle mai a, sorkar thuneitute lam te pawhin ngaituahna sengin lirthei pawh tlan tir rih lo pawh a him zawk mai thei a ni.
Kakichhuah hian Lawngtlai atanga khawthlang lama awm a ni a. Km 132 a hla ni.
