LAWNGTLAIAH ROPUI LEH URHSUN TAKIN CHAPCHAR KÛT HMAN A NI
Lawngtlai, 13th March 2026: Vawiin khan DC pisa tualah mizote kût ropui tak Chapchar Kût chu urhsûn takin hman a ni a. He hunah hian Pu K. Sapdanga, Home Minister chu Kût Pa niin, Dr. Lorrain Lalpekliana Chinzah, Adviser to Chief Minister chu Kût Uaptu niin Lawngtlai Bawrhsap Pu Donny Lalruatsanga chu Kût thlengtu a ni.
Kût Pa chuan Lawngtlai mipui kalkhawmte Chapchar Kût chibai bukna a nei hmasa a. Kût thupui Zo nun ze mawi- Inremna a taka tihlawhtlingtu ni tura sawmin, Zofate tana ni hlu tak, hnam ziarâng tarlanna hun pawimawh tak a nih angin, hlim taka hman a tul hle a ti a. Thlahtute chin thin hlut thiam hi thang leh tharte mawh a ni tih hriaa uar zawka Chapchar Kût hman zel a tul hle a ni, a ti. Ram leh hnam hmasawnna turin hnam ziarâng chawisan zel a pawimawh hle tih tarlangin, Pi leh Puten an hlut ang taka hlut thiam a tul thu a sawi a. A bik takin Lawngtlai District- chu zohnahthlak hnam chi hrang hrang chenna a nih angin, inlungrual leh inrem taka awm turin a sawm a ni. Laifate chu Mizoram hmasawnna tura theihtawp chhuah thin an nih tawh thin thu sawiin, Laifate Mizoram tana thawk zel turin a fuih a ni.
Pu K. Sapdanga chuan ram politics siam tha turin mi tinin mawhphurhna an neih vek thu sawiin, inthiarfihlim lo a, a siamthatu ni theuh turin a sawm a. YLA - ten theihtawp an chhuah thinna fakawm a tih thu sawiin, Ruihhlo do leh khawtlang enkawl kawngah tha thlah lo turin a chah a. Thangthar zawkte tana chhenfakawm khawtlang siam tura thahnemngaih a tul thu sawiin, mahni mawha la theuh turin Lawngtlai mipuite a fuih a ni. Chhim lam chu Mizoram kawtchhuah a ni mai dawn tih sawiin, sawrkar, VC, NGO leh Kohhran te tanho thiam a tul hle a, a tha zawnga hman tum turin a chah a. Pu K. Sapdanga chuan Chapchar Kut hian hlimna chauh minpe lo se, tlawmgnaihna, lungrualna leh inunaina thar mi pe se tiin, Lawngtlai District- mipuite Kût duhsakna a hlan nghal bawk.
Kût Uaptu Dr. Lorrain Lalpekliana Chinzah chuan Chapchar Kût chu hnam ziarâng tarlanna pawimawh tak a ni tiin ram leh hnam humhalhna pawimawh tak a ni, a ti a. Khawvel changkang zelin khawtlangah nghawng nasa tak a nei a, hetij rual hian mahni hnam chin dan te vawn nun zel a pawimawh hle a ti. Ram leh khawtlangah inremna awm turin zo nun zemawi chawisan a hun hle a, i chhawmning zel ang u tiin a sawm a ni. Dr. Lorrain Lalpekliana Chinzah chuan Ruihhlo do kawngah theihtawp chhuah a hun tak zet tih tarlangin, sawrkar leh VC,NGO leh mipuite theihtawp chhuahho a tul hle a, thawkho zel turin a chah a ni. Kût Uaptu chuan ram leh hnam hmasawn zelna turin Inremna i vawng nung zel ang u tiin Lawngtlai mipuite a sawm a ni.
Kût thlentu Pu Donny Lalruatsanga chuan lawmna thu sawiin, Kût Pa, Kût Uaptu leh Kût hmang tura lo kal Lawngtlai mipuite chungah lawmthu a sawi a. Chapchar Kût thupui Zo nun ze mawi- Inremna chu a taka nunpui a pawimawh hle tih tarlangin, rilruah inremna nei turin a fuih a. Zonun ze mawi vawng nunga chawi kang zel turin mi tinin theihtawp chhuah a tul tih sawiin, tlawmgnaihna, inremna, induhsakna leh injmangaihnate a taka nunpui turin kalkhawmte a sawm a ni.
Vawiin Chapchar Kût hmannaah hian hnam lam chi hrang hrang, Costume parade - te entir niin, zai ngaihthlak a ni a, Miss Chapchar Kût, Little Miss leh Little Mister - te thlan nghal a ni a. Lawmman dawngtute chu
Miss Chapchar Kût - Esther C. Lalremruati, L- III
Little Miss- Lizia Vanlalngaihhlui Sathing, Electric Veng
Little Mister- Immanuel Lalvenhima, AOC
Chapchar Kût hmannah hian Official leh Lawngtlai mipuite an tel kim tha hle a, Pi Margaret J. Vanlalremmawii, SDO (S) chuan lawmthu sawina neiin hun a khar.
